Di Bruno Versace
U massaru Fulippu jìu a la fera
pecchì si bisognava ‘na cardara.
Ch’i stessi sordi ‘ccattau ‘na lumera;
dissi ca l’attra s’a volenu cara.
Jendu ‘cchju’ avanti, ‘ncuntra ‘nu gucceri,
‘nu vecchj’amicu, ma di chillhi cari.
«Jamu ca n’di facimu ‘nu bicchjeri
‘i vinu novu, sutt’e castagnari.»
Llhà ‘ssutta c’era Cicciu u funtaneri,
Peppi e cumpari Gianni ‘i Precacori,
‘Ntoni u Spinnatu e u frati ‘i so’ mugghjeri,
Roccu Tringali e Micu d’u trattori.
Chi ‘tti vogghju! ‘Llh’avanti si ‘ssettaru,
calia e luppinu ch’i bicchjeri rasi,
‘nu carratellhu quasi lu smenzaru,
«Bomprudu e nommi nesci d’undi trasi!»
A sira, barchijandu, si levaru,
e Fulippu, ‘mbrijacu e mort’i fami,
si ‘mbicinau davant’o putiharu,
‘i ‘ccatta ‘nu paninu cu’ salami.
Ddon Carmelu, videndul’a llhu statu,
e, penzandu ca poti ‘pprofittari,
pigghjau u sarzizzu sutta d’u bancatu
e, tempu nenti, si mis’a tagghjari.
U bellu vinni quandu nt’a vilanza,
tra ogni ‘ffetta, quasi trasparenti,
mentìa ‘nu fogghj’i carta di sustanza,
ma u salami pisava poc’o nenti.
Quandu cercau tri o quattru mila liri
Fulippu, ‘mbriacu e ‘bbonu, si ‘ncazzau.
‘Cchjappa u paninu e, senza tanti giri,
reggendusi d’u muru ‘lluntanau.
«Volevi mu t’u mentu nt’a li mani?»
dissi Carmelu, ‘n’pedi arret’o bancu,
e Fulippu, gridandu nt’a llhi chjani:
«nt’e mani nò… ma nt’a llhu postu mancu!»
Foto: soniapaladini.it
